Hansı qadın daha xoşbəxtdir?
Sosial davranış üzrə ixtisaslaşan psixoloq Pol Dolan ərə getməyən və uşağı olmayan qadınları daha xoşbəxt sayır. Novator.az-ın məlumatına görə, London İqtisadiyyat Məktəbinin professoru olan psixoloq illərin müşahidəsinə əsaslanıb bildirir ki, sorğuya cəlb olunan evli insanlar yalnız həyat yoldaşlarının yanında həyatlarından razılıq ifadə edirlər. Müsahibə götürənlə təkbətək qalan zaman onların fikirləri dəyişir…
Pol Dolan iddia edir ki, nikah ədətən kişilərin xeyrinədir: onlar daha çox pul qazanır, daha az riskə gedir və ümumilikdə daha çox yaşayırlar. Qadınlar isə evlilik həyatından demək olar heç nə qazanmırlar, əksinə, daha xoşagəlməz hallarla barışmaq zorunda qalırlar.
Psixoloqun fikrincə, əhalinin ən xoşbəxt qismi heç vaxt ərdə olmayan və dünyaya uşaq gətirməyən qadınlardır. O bildirir ki, tək qadınların çoxu daşlaşmış stereotiplər və sosial təzyiqlər səbəbindən öz statusundan narahatdırlar, çünki uzun illər boyu ərli-uşaqlı olmaq qadının ən böyük uğuru sayılıb: “Siz 40 yaşında tənha və övladsız qadını görəndə ona yazığınız gəlir və düşünürsünüz ki, yaxşı kişiyə rast gəlsə, həyatı dəyişər. Amma başqa cür də ola bilər: qadın elə bir kişiyə rast gələr ki, sağlamlığını itirər, bədbəxt olar və vaxtsız ölər”…
Səidə Hüseynova
