Sabunçu vağzalında
Mayın 21-də prezident İlham Əliyev Sabunçu dəmir yolu vağzalı kompleksinin açılışında iştirak edib, yeni inşa edilən Bakı – Sabunçu sərnişin dəmir yolu xətti üzrə görülən işlərlə tanış olub.
AZƏRTAC xəbər verir ki, dövlət başçısı əvvəlcə qəsəbə sakinləri ilə görüşərək söhbətləşib.
İlham Əliyev Sabunçu dəmir yolu vağzalından sərnişin qatarı ilə Bakıxanov və Keşlə vağzallarına gəlib, burada yaradılan şəraitlə tanış olub.
Bakı sərnişin-Sabunçu dəmir yolu prezident İlham Əliyevin 22 yanvar 2018-ci il sərəncamı əsasında yenidən inşa olunub. Layihənin tərkib hissəsi olan Sabunçu dəmir yolu vağzalı tamamilə yenidən qurulub. Üçmərtəbəli binanın ümumi sahəsi 4,1 min kvadratmetrdir.
Bakı dairəvi dəmir yolu xətti üzrə görülən işlərin davamı olaraq Məmmədli kəndində uzunluğu 17 metr olan yeraltı avtomobil keçidi, həmçinin Kürdəxanı kəndində uzunluqları 22 metr olan yeraltı avtomobil və yerüstü piyada keçidləri tikilib.
Sabunçu dəmir yolu vağzalının birinci mərtəbəsində gözləmə zalı, bilet satışı kassaları, məlumat bürosu, server otağı, əşyaların saxlanması kamerası yerləşir.
Vağzalda müasir təhlükəsizlik kameraları, yanğınsöndürmə və havalandırma sistemləri, əlavə olaraq eskalator, lift, 17 turniket quraşdırılıb, iki piyada alt keçidi inşa edilib, stansiyadakı üç dəmir yolu xətti tamamilə yenidən qurulub.
Sabunçu vağzalında Dəmir Yolu Polisinin üçmərtəbəli binası da tikilib və zəruri avadanlıqla təchiz olunub.
Marşrut üzrə dəmir yolu xəttinin uzunluğu bir istiqamət üzrə 13,5 kilometrdir. Bakı sərnişin – Sabunçu dəmir yolu xətti üzərindəki Bakıxanov, Koroğlu, Keşlə və Nərimanov dayanacaqları tamamilə yenidən qurulub.
