Dövlət Statistika Komitəsi makroiqtisadi göstəriciləri açıqlayıb. Novator.az-ın məlumatına görə, hesabatda bildirilir ki, 2019-cu ilin yanvar-aprel aylarında kənd təsərrüfatının ümumi məhsulu 2018-ci ilin ilk dörd ayı ilə müqayisədə 3,9 faiz, o cümlədən bitkiçilik məhsulları istehsalı 22,2 faiz, heyvandarlıq məhsulları istehsalı 2,9 faiz artıb.

Nəqliyyat sektorunda yük daşınmasının 2,1 faiz, sərnişin daşınmasının 1,4 faiz irəli getdiyi qeyd olunur.

İnformasiya və rabitə müəssisələrinin göstərdiyi xidmətlərin həcminin dəyər ifadəsində 11,7 faiz artdığı vurğulanır.

Rəsmi hesabata görə, dörd ayda ictimai iaşə dövriyyəsi real ifadədə 3,5 faiz, əhaliyə göstərilən ödənişli xidmətlərin dəyəri real ifadədə 1 faiz yüksəlib.

Əhalinin gəlirlərinin nominal ifadədə 5,5 faiz artaraq 17 milyard 72 milyon manata çatdığı bildirilir.

Maliyyə Nazirliyinin məlumatına əsasən, yanvar-aprel aylarında dövlət büdcəsinə 7 milyard 503,4 milyon manat vəsait daxil olub, büdcədən 7 milyard 220,5 milyon manat vəsait xərclənib.

Mərkəzi Bank aprel ayının 1-nə ölkənin bank və digər kredit təşkilatlarının kredit portfelini milli valyuta ekvivalentində 13 milyard 58 milyon manat göstərib. Ödəmə vaxtı keçmiş kreditlərin məbləği ümumi kredit portfelinin 11,9 faizinə bərabər olub.

Əhalinin banklardakı əmanətlərinin milli valyuta ekvivalentində məbləği aprel ayının 1-nə 8 milyard 339,1 milyon manat həddində rəsmiləşib.