Qarabağda işğal bayramı
Düşmənin Azərbaycan şəhəri Şuşanı ələ keçirməsinin 27 ili tamam olub. Novator.az bildirir ki, işğalçı Ermənistanın baş naziri Nikol Paşinyan mayın 9-u Dağlıq Qarabağda işğal bayramına qatılıb. Əvvəlcə Xankəndi şəhərindəki yürüşün iştirakçısı olan baş nazir sonra Şuşaya gedərək hərbi cani, Ermənistanın müdafiə naziri və baş naziri olmuş Vazgen Sərkisyanın (1999-cu ildə terror aktında öldürülüb) abidəsini ziyarət edib, şəhərdəki şənlik mərasiminə baş çəkib.
Əsası 1750-ci ildə qoyulan Şuşa əvvəl Qarabağ xanlığının paytaxtı, xanlıq ləğv ediləndən (1822-ci il) sonra Qarabağ əyalətinin (daha sonra Şuşa qəzasının) baş şəhəri, 1923-cü ildən isə Azərbaycanın Dağlıq Qarabağ vilayətində rayon mərkəzi olub.
1988-ci ildə ermənilər Dağlıq Qarabağın Ermənistanın tərkibinə verilməsi tələbi ilə separatçı hərəkata başlayıb. Bu hərəkat getdikcə vüsət alaraq Ermənistanın Azərbaycana açıq hərbi təcavüzünə çevrilib.
1991-ci il sentyabrın 2-də ermənilər Dağlıq Qarabağı “müstəqil dövlət” elan edib. Bunun ardınca işğalçı müharibə alovlanıb, bölgə hissə-hissə ermənilərin əlinə keçib.
1992-ci il mayın 8-nə keçən gecə Dağlıq Qarabağda azərbaycanlıların əsas dayaq nöqtəsi olan Şuşaya hücum edən erməni birləşmələri mayın 9-da şəhəri ələ keçirib. Bununla da Dağlıq Qarabağın işğalı başa çatıb.
Hazırda ermənilər Dağlıq Qarabağ ətrafındakı Laçın, Kəlbəcər, Ağdam, Füzuli, Cəbrayıl, Qubadlı, Zəngilan rayonlarını da işğal altında saxlayır.
