“Bir şərabçının tarixçəsi…” kitabının təqdimatı keçirilib
Bugünlərdə Gəncədə “Bir şərabçının tarixçəsi…” kitabının təqdimatı keçirilib.
Şərabçılıq üzrə mütəxəssis, texnika elmlər doktoru, professor Hasil Kəmaləddin oğlu Fətəliyevin həyatından və elmi fəaliyyətindən bəhs edən kitab “Ecoprint” mətbəəsində capdan çıxıb.
Kitabın müəllifi Sevda Sultanovadır.
Kitabda Avropa şərabçılıq ənənələri fonunda Azərbaycanda üzümçülüyun və şərabçılığın inkişafı, əcnəbi alimlərin bu sahədə rolu, ölkəmizin beynəlxalq şərab festivalında iştirakı, habelə sənaye və ev şərabçılığının inkişaf prespektivləri haqqında maraqlı məlumatlar, 60 yaşı tamam olan professor Hasil Fətəliyevin şərab turizmi, şərab mədəniyyəti barədə fikirləri yer tutur.
Alimin Prezident Kitabxanasına daxil edilmiş bir neçə kitabı, habelə 20-yə yaxın dərslik və dərs vəsaiti, elmi monoqrafiya və broşuraları Azərbaycan şərabçılığına və qida məhsullarının saxlanması və texnologiyasına töhfə kimi qiymətləndirilir.
“Bir şərabçının tarixçəsi…” kitabının təqdimatı Azərbaycan Dövlət Aqrar Universitetinin qida təhlükəsizliyi və ekspertiza kafedrasının təşəbbüsü ilə baş tutub.
Təqdimat mərasimində kafedranın professoru Firudin Cəfərov, kafedranın dosenti Aidə Əsgərova, “Az-Qranata” MMC-nin direktoru, texnika elmləri doktoru, professor Vüqar Mikayılov, Azərbaycan Texnologiya Universitetinin qida mühəndisliyi və ekspertiza kafedrasının müdiri, biologiya elmləri doktoru, professor Əhəd Nəbiyev, həmin universitetin qida mühəndisliyi fakültəsinin dekanı, dosent Mərdan Tağıyev, Azərbaycan Dövlət Aqrar Universitetinin aqromühəndislik fakültəsinin dekanı, texnika elmləri doktoru, professor Camaləddin Məmmədov, dekan müavini, dosent Təvəkkül İslamov, həmin fakültənin dosenti Səyavuş Vəliyev, Azərbaycan Üzümçülük və Şərabçılıq Elmi-Tədqiqat İnstitutunun direktoru, dosent Elnur Heydərov, Azərbaycan Dövlət İqtisad Universitetinin dosenti Natəvan Qədimova, veteran şərabçı Vaqif Ağayev, Gəncə Üzümçülük və Şərabçılıq Təcrübə Stansiyasının direktoru, dosent Mehman İsmayılov, Azərbaycan Kooperasiya Universitetinin dekan müavini Azər Tağıyev, Hasil Fətəliyevin qardaşları Hacı İsmayıl, Hacı Fikrət, Səxavət, Namiq, qızı Ulviyyə Fətəliyeva (beynəlxalq qrossmeysterdir, İtaliyanın Sapeniza Universitetinin magistrantıdır), tələbə yoldaşları Xosrov Natil, Akif Əsədov, Fizuli Babayev, habelə doktorant və dissertantları çıxış ediblər.
Çıxışlarda Hasil Fətəliyev təvazökar insan, görkəmli alim kimi xarakterizə olunub, onun bioqrafiyası və elmi yaradıcılığı haqqında təəssüratlar ifadə edilib. Natiqlər alimi 60 illik yubileyi münasibətilə təbrik ediblər.
