Vergilər Nazirliyi vergi ödəyicisinin təsərrüfat subyekti (obyekti) üzrə yenidən uçota alınması qaydasını təsdiqləyib. Rəsmi məlumata görə, qayda ən azı bir təsərrüfat subyekti (obyekti) olan vergi ödəyicilərinə aiddir. Qaydanın müddəaları mərkəzləşdirilmiş qaydada uçota alınmış vergi ödəyicilərinə şamil edilmir.

Yeniliyə əsasən, vergi ödəyicisinin bir obyekti olduqda və həmin təsərrüfat subyekti vergi ödəyicisinin olduğu yerdən kənarda yerləşdikdə sahibi obyektin olduğu ünvan üzrə verilən rəy əsasında yenidən uçota alınır. Vergi ödəyicisinin obyekti vergi uçotundan çıxarıldıqda həmin vergi ödəyicisi olduğu yer üzrə yenidən uçota alınmalı və bu barədə növbəti ayın 20-dək Maliyyə Nazirliyinə məlumat təqdim edilməlidir.

İki və daha çox obyekti olan vergi ödəyicisi iqtisadi maraqlar mərkəzinin yerləşdiyi ünvan üzrə yenidən uçota alınmalıdır. Mərkəzin yerləşdiyi ünvan üzrə yenidən uçota alınma vergi ödəyicisinin müraciəti və ya vergi orqanının təşəbbüsü ilə həyata keçirilir.

Obyekt sahibi olan vergi ödəyicilərinin yenidən uçota alınması Vergilər Nazirliyinin təhlil strukturunun iyun ayının 5-dək verdiyi rəy əsasında vergi ilindən sonrakı ilin yanvar ayında həyata keçirilir. Verilən rəydə qeyd edilən vergi ödəyiciləri barədə məlumatlar Maliyyə Nazirliyi ilə razılaşdırılmış formada rəyin alındığı ilin iyun ayının 15-dək Maliyyə Nazirliyinə təqdim edilməlidir.