23 yaşlı qəhrəmanın 50 yaşı
Şəhid döyüşçü Albert Aqarunovun 50 illik yubileyidir. Müsavat başqanı Arif Hacılı, sabiq başqan İsa Qəmbər və bir qrup partiya üzvü aprelin 25-də Bakının Şəhidlər xiyabanında onun məzarını ziyarət ediblər. Ziyarətdə Milli Qəhrəmanın qardaşı Rantik Aqarunov, bir qrup şuşalı, Qarabağ döyüşçüləri və diplomatik korpusun nümayəndələri iştirak edib.
Novator.az-ın məlumatına görə, özünün “Facebook” səhifəsində mərasimdən fotolar paylaşan İsa Qəmbər yazıb: “Milli Qəhrəmanımız Albert Aqarunov – 50! 23 il yaşadı, 27 ildir unudulmur. 270 il keçsə də unudulmayacaq”.
Albert Aqarunoviç Aqarunov 1969-cu il aprelin 25-də Bakının Əmircan qəsəbəsində yəhudi ailəsində doğulub.
Qarabağ müharibəsi başlayanda könüllü olaraq cəbhəyə yollanıb. Tank komandiri olan Albert Aqarunov Xankəndi, Daşaltı, Cəmilli istiqamətində gedən döyüşlərdə erməni işğalçılarının xeyli canlı qüvvəsini və zirehli texnikasını məhv edib. O, 23 yaşında olarkən, 1992-ci il mayın 8-də Şuşa uğrunda gedən döyüşlərdə snayper gülləsinə tuş gələrək döyüş meydanında qəhrəmancasına şəhid olub.
Döyüşçü Azərbaycan prezidentinin 7 iyun 1992-ci il fərmanı ilə (o vaxt prezident səlahiyyətlərini İsa Qəmbər icra edib) Azərbaycanın Milli Qəhrəmanı adına layiq görülüb.
