Seçki yarışı ikinci tura qaldı
Şimali Makedoniyada aprelin 21-də keçirilmiş prezident seçkisinin nəticələri açıqlanıb. Novator.az-ın məlumatına görə, hakim sol mərkəzçi qüvvənin namizədi Stevo Pendarovski 42,8%, mühafizəkarları təmsil edən Qordana Silyanovska-Davkova 42,2% səslə ikinci tura keçiblər. Alban icmasının namizədi Blerim Reka 10,6% səs toplayaraq seçki yarışından ələnib.
İkinci tur mayın 5-nə təyin olunub.
Makedoniya 1991-ci ildə Yuqoslaviya Sosialist Federativ Respublikasından ayrılaraq müstəqil dövlət olub. Yunanıstan Makedoniyanın adının öz vilayətinin adı ilə üst-üstə düşməsini əsas gətirərək bu ölkənin müxtəlif beynəlxalq qurumlara, o cümlədən NATO-ya qəbul olunmasına əngəl törədib. Bu ilin yanvarında ölkə adını rəsmən dəyişərək Şimali Makedoniya Respublikası olub və problem həllini tapıb.
Fevralın 6-da NATO-ya üzv ölkələrin və Şimali Makedoniyanın hərbi alyansdakı səfirləri Brüsseldə protokol imzalayıblar. Sənəd Şimali Makedoniyanın NATO-ya üzv olmasını nəzərdə tutur.
