Filologiya və jurnalistika fakültəsində yeni dekan
Azərbaycan Dillər Universitetinin filologiya və jurnalistika fakültəsinə yeni dekan seçkisi olub.
Seçkinin nəticəsinə əsasən universitetin rektoru, akademik Kamal Abdullanın əmri ilə professor Şahin Xəlilli filologiya və jurnalistika fakültəsinin dekanı təyin edilib.
Azərbaycan Dillər Universitetinin mətbuat xidmətindən Novator.az-a bildiriblər ki, Şahin Həmid oğlu Xəlilli 1973-cü ildə Azərbaycan Pedaqoji Xarici Dillər İnstitutunun ingilis və Azərbaycan dilləri fakültəsini bitirib. 1976-cı ildən indiki Azərbaycan Dillər Universitetində əmək fəaliyyətini davam etdirir.
Şahin Xəlilli 1985-ci ildə “Ceyms Oldricin yaradıcılığında Azərbaycan mövzusu”nda namizədlik dissertasiyası, 2005-ci ildə “Azərbaycan-ingilis ədəbi əlaqələri (qədim və orta əsrlər dövrü)” adlı doktorluq dissertasiyası müdafiə edib.
“Ədəbi əlaqələr işığında” (2002), “Azərbaycan-ingilis ədəbi əlaqələri. Folklor materialları əsasında” (2002), “Klassik poeziya və ədəbi əlaqələr. Azərbaycan-ingilis ədəbi əlaqələri” (2003) adlı kitab və monoqrafiyaların, magistr hazırlığı üçün “XX əsr Böyük Britaniya və Amerika ədəbiyyatı tarixi” fənni üzrə proqramın (2009), “Şekspirin sonetləri” (2009) dərs vəsaitinin, “Shakespeare’s English Historic Plays” (həmmüəllif S.Magill. 2009), “British Literature. Medieval Ages” (həmmüəllif A.Tatli. 2012), “Britaniya uşaq ədəbiyyatı” (həmmüəllif Səadət Əliyeva. 2018) dərs kitablarının, “Ceyms Oldric və Azərbaycan” adlı toplunun, həmçinin “Yerin ulduzları” (1990), “Ürəyimdən keçənlər” (1996) uşaq şeirləri kitablarının müəllifidir.
