Dövlət dilinin tətbiqinə nəzarət qurumu ilə bağlı qərar verildi
Nazirlər Kabineti Dövlət Dil Komissiyası yanında Monitorinq Mərkəzi publik hüquqi şəxsin strukturunu, işçilərinin say həddini və əməkhaqqı fondunu təsdiqləyən qərar verib. Qərara əsasən, Monitorinq Mərkəzi aparatdan ibarət olur, işçilərin say həddi 17 ştat vahidi, aylıq əməkhaqqı fondu 10 min 80 manat məbləğində müəyyən edilir.
Novator.az bildirir ki, prezident İlham Əliyevin ötən il noyabrın 1-də imzaladığı fərmanla Nazirlər Kabinetinə Dövlət Dil Komissiyası yanında Monitorinq Mərkəzi publik hüquqi şəxs yaratmağı tapşırıb. Dövlət büdcəsindən maliyyələşən mərkəz dövlət dilinin tətbiqinə nəzarətlə məşğul olmalı, kütləvi informasiya vasitələrində, internet resurslarında və reklam daşıyıcılarında ədəbi dil normalarının qorunmasını təmin etməlidir.
Dövlət Dil Komissiyasına prezident sədrlik edir. Onun 4 müavini var: Mehriban Əliyeva (birinci vitse-prezident), Ramiz Mehdiyev (Prezident Administrasiyasının rəhbəri), Akif Əlizadə (AMEA-nın prezidenti), Anar Rzayev (Azərbaycan Yazıçılar Birliyinin sədri).
Quruma Vasif Talıbov (Naxçıvan Muxtar Respublikası Ali Məclisinin sədri), Əli Həsənov (prezidentin ictimai-siyasi məsələlər üzrə köməkçisi), İsa Həbibbəyli (AMEA-nın vitse-prezidenti), Rafael Hüseynov (Milli Azərbaycan Ədəbiyyatı Muzeyinin direktoru), Kamal Abdulla (Azərbaycan Dillər Universitetinin rektoru), Nizami Cəfərov (Atatürk Mərkəzinin müdiri) və başqa şəxslər daxildir.
