Birinci rübün vergi hesabatı
Vergilər Nazirliyi 2019-cu ilin birinci rübünün hesabatını yayıb. Rəsmi məlumata görə, nazirlik yanvar-mart aylarında dövlət büdcəsinə 1 milyard 672,9 milyon manat vergi səfərbər edib, proqnoza 110,4% əməl olunub, əvvəlki ilin üç ayı ilə müqayisədə 16,5% çox vəsait toplanıb.
Ödənilən vergilərin 30,9%-i neft-qaz sektorunun, 69,1%-i qeyri-neft-qaz sektorunun payına düşüb. Qeyri-neft-qaz sektoru üzrə vergi daxilolmalarının artımı 18,3% göstərilir.
Vergi daxilolmalarında qeyri-dövlət sektorunun xüsusi çəkisi 76,5%-ə çatıb.
Regionlardan vergi daxilolmaları 168,4 milyon manat təşkil etməklə ötən ilin müvafiq dövrü ilə müqayisədə 24,3% çox olub.
Məcburi dövlət sosial sığortası üzrə daxilolmalar 582,1 milyon manat olmaqla 110,8%, işsizlikdən sığorta üzrə daxilolmaların məbləği 22,8 milyon manat olmaqla 117,3% icra olunub.
Birinci rübdə qeydiyyatdan keçmiş vergi ödəyicilərinin sayı 25 min 536 olub, bu da ötən ilin müvafiq dövrünə nisbətən 25,5% çoxdur.
Qeydiyyatdan keçmiş vergi ödəyicilərinin 52,2%-i regionların payına düşüb.
Aksizli malların istehsalına və dövriyyələrinə nəzarətin artırılması hesabına alkoqollu içkilərin istehsalında dövriyyə 1,7 dəfə, tütün məmulatlarının istehsalında dövriyyə 7,4 dəfə artıb.
Üç ayda vergi borcu 14 milyon 624 min manat olan 1858 vergi ödəyicisi və vəzifəli şəxslərin ölkədən getmə hüququ məhdudlaşdırılıb, bunun nəticəsində borcun 50%-dən çoxu dövlət büdcəsinə ödənib.
