Beynəlxalq Münasibətlərin Təhlili Mərkəzinin nizamnaməsi təsdiqləndi
Aprelin 19-da fərman imzalayan prezident İlham Əliyev Beynəlxalq Münasibətlərin Təhlili Mərkəzinin nizamnaməsini təsdiqləyib.
Novator.az bildirir ki, fevralın 6-da yaradılan Beynəlxalq Münasibətlərin Təhlili Mərkəzi dünyada və regionda baş verən prosesləri təhlil edən, Dağlıq Qarabağ münaqişəsinin müxtəlif aspektləri, beynəlxalq münasibətlər və təhlükəsizlik məsələləri ilə bağlı fundamental araşdırmalar aparan, bu məsələlərə dair Azərbaycanın mövqeyinin beynəlxalq ictimai, siyasi və akademik dairələrə çatdırılmasında iştirak edən, Azərbaycanın dövlət orqanlarını elmi-təhlili materiallarla təmin edən publik hüquqi şəxsdir. Mərkəzə ümumi rəhbərliyi və nəzarəti üç üzvdən ibarət İdarə Heyəti həyata keçirir.
İlham Əliyev fevralın 19-da Fərid Rauf oğlu Şəfiyevi Azərbaycanın Çexiyada fövqəladə və səlahiyyətli səfiri vəzifəsindən geri çağıraraq Beynəlxalq Münasibətlərin Təhlili Mərkəzinin İdarə Heyətinin sədri təyin edib.
İdarə Heyətinin digər üzvlərinin təyinatı da prezidentin səlahiyyətindədir. Bu qurum Nazirlər Kabinetinin razılığı ilə təsərrüfat cəmiyyətləri yarada bilər.
Mərkəzin ilkin nizamnamə fondu 100 min manatdır.
Onun əmlakı həmçinin təsisçinin verdiyi digər əmlakdan, dövlət büdcəsindən ayrılan vəsaitdən, fəaliyyətindən əldə etdiyi gəlirdən, ianələrdən, qrantlardan, cəlb edilən investisiyalardan və qanuna uyğun əldə etdiyi digər vəsaitdən formalaşır.
19 aprel fərmanında prezident mərkəzə qurumun strukturunu təsdiqləməyi tapşırıb.
Nazirlər Kabineti mərkəzin işçilərinin say həddini və əməkhaqqı fondunu iki ay müddətində təsdiqləməlidir.
