2019-cu ilin yanvar-mart aylarında Azərbaycanda ümumi daxili məhsul əvvəlki ilin birinci rübü ilə müqayisədə 3 faiz, sənaye məhsulu istehsalı 4,4 faiz artıb.

Novator.az-ın məlumatına görə, Dövlət Statistika Komitəsi bildirir ki, kənd təsərrüfatının ümumi məhsulunda 3,6 faiz, o cümlədən bitkiçilik məhsulları istehsalında 24,7 faiz, heyvandarlıq məhsulları istehsalında 2,8 faiz artım qeydə alınıb.

Nəqliyyat sektorunda yük daşınmasının 2,1 faiz, sərnişin daşınmasının 1,3 faiz yüksəldiyi vurğulanır.

Hesabata əsasən, informasiya və rabitə xidmətlərinin həcmi dəyər ifadəsində 7,6 faiz artıb, bu sahədə əldə edilmiş gəlirin 82,3 faizi qeyri-dövlət sektorunun payına düşüb.

Əhalinin gəlirləri nominal ifadədə 5,5 faiz artaraq 12 milyard 590,6 milyon manat təşkil edib.

Birinci rübdə dövlət büdcəsinə 5 milyard 439,7 milyon manat vəsait daxil olub, büdcədən 5 milyard 35,9 milyon manat vəsait xərclənib.

Martın 1-nə ölkənin bank və digər kredit təşkilatlarının kredit portfeli milli valyuta ekvivalentində 12 milyard 974,6 milyon manat təşkil edib. Ödəmə vaxtı keçmiş kreditlərin məbləği ümumi kredit portfelinin 12,2 faizinə bərabər olub.

Əhalinin banklardakı əmanətlərinin milli valyuta ekvivalentində məbləği martın 1-nə 8 milyard 213,9 milyon manat göstərilib.