Finlandiya: müxalifət seçkini uddu
Finlandiyada aprelin 14-də keçirilmiş parlament seçkisinin ilkin nəticələri açıqlanıb. Novator.az-ın məlumatına görə, müxalif Sosial Demokrat Partiyası səslərin 17,7%-ni toplayaraq 200 yerlik parlamentdə 40 mandata sahib çıxıb.
Mühacirlərə qarşı sərt mövqeyi ilə tanınan ifrat sağ mövqeli Əsl Finlər Partiyası 17,5% səslə ikinci yerdə qərar tutub və 39 mandat əldə edib.
Mühafizəkarları birləşdirən Milli Koalisiya Partiyası 17% səs hesabına 38 mandat götürə bilib.
Baş nazir Yuha Sipilanın rəhbərlik etdiyi Mərkəz Partiyası 13,8% səslə 31 mandat qazanıb.
11,5% səs əldə edən Yaşıl İttifaq bloku parlamentə 20 nəfər keçirib.
