Qazaxıstanda prezident seçkisi irəli çəkildi
Qazaxıstanda növbədənkənar prezident seçkisi təyin olunub. Novator.az-ın məlumatına görə, aprelin 9-da televiziya ilə xalqa müraciət edən dövlət başçısı Qasım-Comərd Tokayev seçkinin iyunun 9-da keçiriləcəyini, bu haqda sərəncam imzaladığını bildirib.
1989-cu ildən Qazaxıstanı idarə edən Nursultan Nazarbayev bu il martın 20-də istefa verib.
Dövlət başçısı postundan getsə də, Nursultan Nazarbayev Təhlükəsizlik Şurasının sədri, Konstitusiya Şurasının üzvü, hakim Nur Otan Partiyasının lideri vəzifələrində qalır.
Martın 20-də Qasım-Comərd Tokayev and içərək Qazaxıstanın ikinci prezidenti olub. Qasım-Comərd Tokayev həmin günədək parlamentin yuxarı palatasının – Senatın sədri idi.
1953-cü ildə doğulan Qasım-Comərd Tokayev Moskva Dövlət Beynəlxalq Münasibətlər İnstitutunu bitirib. Xarici işlər naziri (1994-1999, 2002-2007), baş nazir (1999-2002), Senatın sədri (2007-2011, 2013-2019), BMT baş katibinin müavini (2011-2013) vəzifələrini tutub.
Ölkədə növbəti prezident seçkisi 2020-ci ilin yazında keçirilməli idi.
