Sərkisyanı aşırdan inqilab bayram oldu
Ermənistanda yeni dövlət bayramı təsis olunur – Vətəndaş Günü. Novator.az-ın məlumatına görə, ölkə parlamenti aprelin 8-i hökumətin təqdimatı əsasında belə qanun layihəsi qəbul edib.
Vətəndaş Günü hər il aprelin son şənbə günü bayram olunacaq. Aprelin son şənbəsi ayın 24-nə – “erməni soyqırımı” gününə təsadüf edərsə, bayram bazar gününə keçiriləcək.
1998-ci ildən Ermənistana Azərbaycanın Dağlıq Qarabağ bölgəsində doğulmuş şəxslər rəhbərlik edib. 2008-ci ilədək dövlət başçısı postunu Robert Köçəryan, 2018-ci ilədək Serj Sərkisyan tutub.
2018-ci il martın 31-dən Vətəndaş Sazişi Partiyasının lideri, deputat Nikol Paşinyan Ermənistanın bir çox şəhəri boyunca Serj Sərkisyanın baş nazir olmaq niyyətinə qarşı yürüş keçirib. Aprelin 13-dən Yerevanda onun başçılığı ilə keçirilən davamlı aksiyalarda Serj Sərkisyanın hakimiyyətdən getməsi tələb edilib.
Serj Sərkisyan aprelin 17-də baş nazir kürsüsünə oturub, ancaq aprelin 23-də istefa verib. Mayın 8-dən baş nazir postuna Nikol Paşinyan keçib.
Ötən il dekabrın 9-da keçirilmiş növbədənkənar parlament seçkisində Nikol Paşinyanın “Mənim addımım” bloku qalib gələrək hökumət qurub.
