Qarabağ Komitəsi və Demokratik Qüvvələrin Milli Şurası aprelin 20-nə iki ayrı-ayrı mitinq təyin ediblər. Aksiyalar ayrı-ayrı olsa da, məkan və vaxt eynidir: hər iki qurum Bakı Şəhər İcra Hakimiyyətinə müraciətdə mitinqi paytaxtın Yasamal rayonundakı İdman-Sağlamlıq Kompleksinin stadionunda, saat 15-dən 17-dək keçirmək istədiyini bildirib.
Aprelin 8-də Novator.az-ın bu məsələ ilə bağlı sualını cavablandıran Qarabağ Komitəsinin İdarə Heyətinin üzvü İlham İsmayıl deyib ki, qurum Milli Şura ilə razılığa gəlib mitinq gününü dəyişməyi planlaşdırır: “Bu məsələnin problem olacağını düşünmürəm. Qarabağ Komitəsi Demokratik Qüvvələrin Milli Şurası ilə müzakirələr aparıb öz aksiyasını aprelin 27-nə keçirdə bilər”.
Bir qrup ictimai-siyasi xadimin ötən il yaratdığı Qarabağ Komitəsinin İdarə Heyətində İlham İsmayılla yanaşı Pənah Hüseyn, Mirmahmud Mirəlioğlu, Tural Abbaslı, Əvəz Zeynallı, Sahib Kərimli, Taleh Əliyev, Felmar Ələkbərov və Əlövsət Sadıqov təmsil olunurlar.
2013-cü ildə yaradılmış Milli Şuraya tarixçi alim Cəmil Həsənli sədrlik edir. Qurumun öncül şəxsləri arasında AXCP sədri Əli Kərimli, Müsavat Partiyasından Tofiq Yaqublu, Vətəndaş Həmrəyliyi Partiyasından Rafiq Manaflı, Qarabağ Uğrunda İslami Müqavimət Hərəkatından Rövşən Əhmədli, sabiq deputatlar İbrahim İbrahimli, Gültəkin Hacıbəyli və başqaları var.
