Məhkəmə-hüquq sistemində islahatlar fərmanı
Prezident İlham Əliyev məhkəmə-hüquq sistemində islahatlara fərman verib. Aprelin 3-də imzalanan sənəddə Ali Məhkəməyə və Baş Prokurorluğa cəza siyasətinin humanistləşdirilməsi və cinayətlərin dekriminallaşdırılması üzrə qanun layihələrini hazırlayıb üç ay müddətində dövlət başçısına təqdim etmək tövsiyə olunur. Ədliyyə Nazirliyi eyni yöndə tapşırıq alıb.
Ali Məhkəmə, Məhkəmə-Hüquq Şurası və Ədliyyə Nazirliyi bu məsələlərə dair normativ hüquqi aktların layihələrini iki ay müddətində hazırlamalıdırlar:
– vergi və gömrük ödənişləri, məcburi dövlət sosial sığorta haqlarının ödənilməsi ilə bağlı yaranan mübahisələrə, habelə sahibkarlıq fəaliyyəti ilə əlaqədar digər məsələlərə dair işlər üzrə ixtisaslaşmış məhkəmənin yaradılması;
– Ali Məhkəmənin vahid məhkəmə təcrübəsi formalaşdırmaq vəzifəsinin və həmin vəzifənin icra olunması mexanizminin təsbit edilməsi;
– məhkəmələrin fəaliyyətinə müdaxilənin qarşısının alınması mexanizmlərinin təkmilləşdirilməsi və belə müdaxiləyə görə məsuliyyətin artırılması;
– hakimlərin maddi təminatının əhəmiyyətli dərəcədə artırılması;
– məhkəmələrdə baxılan işlər üzrə ödənilən dövlət rüsumunun dərəcələrinin verilən iddiaların qiymətinə müvafiq olaraq diferensiasiya edilməsi;
– məhkəmələrdə baxılan işlər üzrə ödənilən dövlət rüsumunun müəyyən hissəsinin məhkəmə aparatları işçilərinin sosial müdafiəsinin gücləndirilməsinə və məhkəmələrin maddi-texniki bazasının möhkəmləndirilməsinə yönəldilməsi;
– bütün məhkəmə iclaslarının fasiləsiz audioyazısının aparılması və protokolun məhkəmə iclasının audioyazısına uyğun tərtibi tələbinin müəyyən edilməsi;
– mülki işlər, habelə inzibati xətalara, iqtisadi və inzibati mübahisələrə dair işlər üzrə məhkəmə ekspertizasının keçirilməsi və ekspert rəyinin verilməsi müddətlərinin dəqiqləşdirilməsi, məhkəmə prosesi tərəflərinin ekspertiza təyin edilməsi ilə bağlı hüquqlarının genişləndirilməsi.
Məhkəmə-Hüquq Şurasına tövsiyələr arasında məhkəmə qərarlarının elektron qaydada dərc edilməsi; məhkəmələrdə işlərin təsadüfi və avtomatik şəkildə elektron qaydada bölüşdürülməsi məsələləri də var.
Ədliyyə Nazirliyinə “Elektron icra” informasiya sisteminin tətbiqinin genişləndirilməsi məqsədilə tədbirlər görmək tapşırılıb.
Fərmana görə, birinci instansiya məhkəmələrində kargüzarlığın aparılması ilə bağlı dövlət büdcəsində nəzərdə tutulmuş vəsaitin birbaşa hakimlərin bank hesablarına köçürülməsi barədə təkliflər bir ay müddətində prezidentə təqdim olunmalıdır.
Novator.az bildirir ki, sənəd Azərbaycanın məhkəmə sisteminə daxil olan məhkəmələrin hakimlərinin ümumi sayının 200 nəfər artırılmasını da nəzərdə tutur.
Nazirlər Kabineti dövlət büdcəsində dövlət hesabına göstərilən hüquqi yardıma görə vəsaitin birbaşa Vəkillər Kollegiyasına ayrılması barədə müvafiq normativ hüquqi aktların layihələrini hazırlayıb bir ay müddətində prezidentə təqdim etməlidir.
