Zərərli maddələrin 84,6 faizi avtomobillərdən gəlir
Dövlət Statistika Komitəsi atmosferə buraxılan zərərli maddələr haqqında hesabat yayıb. Rəsmi məlumata görə, 2018-ci ildə Azərbaycanda stasionar mənbələrdən və avtomobillərdən atmosfer havasına buraxılan çirkləndirici maddələrin həcmi 2017-ci illə müqayisədə 37,9 min ton azalaraq 1 milyon 122,6 min tona düşüb. Bunun 84,6 faizi avtomobillərdən atılan tullantılar olub.
Hesabata əsasən, stasionar mənbələrdən atılmış zərərli maddələrin həcmi 6,4 faiz, avtomobillərdən atılmış maddələrin həcmi 2,7 faiz azalıb.
Ötən il stasionar mənbələrdən atmosferə təmizlənmədən atılan zərərli maddələrin 57,9 faizi təmizləyici qurğular vasitəsilə zərərsizləşdirilib. Sənaye müəssisələrində yeni qaztəmizləyici qurğuların istifadəyə verilməsi, mövcud təmizləyici qurğuların səmərəliliyinin artırılması və texnoloji proseslərin təkmilləşdirilməsi nəticəsində havaya il ərzində 1,2 min ton zərərli maddələrin buraxılmasının qarşısı alınıb.
Tullantıların həcmi sənaye mərkəzlərindən olan Mingəçevir şəhərində 4,7 min ton, Şirvan şəhərində 1,9 min ton, Sumqayıt şəhərində 0,3 min ton azalıb, Bakıda isə 7,9 min ton artıb.
Atmosferə atılmış zərərli tullantıların 66,7 faizini karbohidrogenlər, 12,1 faizini azot oksidi, 9,7 faizini karbon oksidi, 0,4 faizini kükürd anhidridi, qalan hissəsini digər çirkləndirici maddələr təşkil edib.
