Karyerada ilk addım atıldı
Əmək və Əhalinin Sosial Müdafiəsi Nazirliyi yanında Dövlət Məşğulluq Xidməti Bakı Mühəndislik Universitetində “Karyerada ilk addım” devizli aktiv məşğulluq tədbiri keçirib. Martın 18-də yayılan rəsmi məlumata görə, tədbirdə tələbə və məzunlara yiyələndikləri ixtisaslara əmək bazarında tələbat haqqında bilgi verilib, işəgötürənlərlə ilkin əlaqələr qurmaq imkanı yaradılıb.
Aktiv məşğulluq tədbirində 73 müəssisədən 543, eyni zamanda Bakı Mühəndislik Universitetindən dəvət almış 14 özəl müəssisədən 234 vakant iş yeri təqdim edilib. İştirakçılara seçdikləri və ixtisaslarına uyğun vakant iş yerlərinə göndərişlər verilib. Həmçinin tələbə və məzunlar işəgötürənlərin nümayəndələrinə özləri haqda məlumatlar təqdim ediblər.
26 müəssisədən tələbə və məzunlara təcrübə proqramları təklif olunub. Ayrı-ayrı iştirakçılar bu proqramlarda iştirak etmək üçün qeydiyyata alınıblar.
2016-cı ildə yaradılmış Bakı Mühəndislik Universiteti ali təhsilin bütün səviyyələri üzrə mühəndis kadrlarının hazırlığı, bu sahədə ali və əlavə təhsil proqramlarının həyata keçirilməsi, fundamental və tətbiqi elmi tədqiqatlar aparan publik hüquqi şəxsdir.
