Azərbaycanlıları ermənilərdən və gürcülərdən tez xəstələndirən nədir?
Bir qrup amerikalı alim 192 ölkə üzrə tibbi-statistik araşdırma aparıb. Respublikaçı Alternativ Partiyasının sədri İlqar Məmmədov öz bloqunda bu haqda yazıb.
Novator.az-ın məlumatına görə, İlqar Məmmədov bildirib ki, amerikalı alimlər əvvəlcə yaşla əlaqədar 90 xəstəlik növünü müəyyən ediblər. Sonra bu xəstəliklərin insanlarda hansı yaşdan kəskin artdığına baxıblar.
Aydın olub ki, İsveçrədə bu, 76 yaş, Əfqanıstanda 51 yaşdır. Dünya üzrə bu göstəricinin 65 yaş olduğu bildirilir.
Cənubi Qafqaz ölkələrinin hər üçündə göstərici dünya üzrə orta yaş həddindən aşağıdır.
Araşdırmaya görə, yaşla əlaqədar xəstəliklərin kəskin artdığını adamlar Ermənistanda 64 yaşdan, Gürcüstanda 60 yaşdan, Azərbaycanda 58 yaşdan hiss etməyə başlayırlar.
İlqar Məmmədov amerikalı alimlərin araşdırmasına istinadla yazır ki, yaşla əlaqədar xəstəlikləri azərbaycanlıların ermənilərdən və gürcülərdən daha erkən yaşda hiss etməsinin səbəbləri bizim yeməyimizdə, içməyimizdə, iş şəraitimizdə, yaşadığımız ətraf mühitdə, aldığımız tibbi xidmətin və dərmanların keyfiyyətində, təhsilimizin səviyyəsində və başqa amillərdədir.
İlqar Məmmədovun yazdığına görə, alimlər 1990-cı ildə Azərbaycan, Gürcüstan və Ermənistanda vəziyyətin təxminən eyni olduğunu, lakin sonradan Gürcüstanla Ermənistanın Azərbaycandan qabağa keçdiyini açıqlayıblar.
Respublikaçı Alternativ Partiyasının sədri bunu 25 ildən çoxdur Azərbaycana Əliyevlərin rəhbərlik etməsi ilə əlaqələndirir, çünki müəllifin fikrincə, sadalanan amillərin əksəriyyətinə, bəlkə də hamısına hakimiyyət təsir edə bilir: “Xüsusilə də 25 il kimi uzun müddətdə”.
Yazısını “Bunu Əliyev rejiminin anti-sosial siyasəti etməyibsə, kimin siyasəti edib” sualı ilə bitirən İlqar Məmmədov başlığa “Anti-sosial siyasət necə olur ki” sualını çıxarıb.
