Tbilisi sakini ərzağa nə qədər xərcləyir?
AST təhlil və məsləhət şirkəti Gürcüstan paytaxtı Tbilisinin sakinləri arasında ərzaq xərci sorğusu aparıb. Novator.az-ın məlumatına görə, sorğu Tbilisi sakinlərinin hər ay ərzağa orta hesabla 569 lari (210 ABŞ dollarından çox) xərclədiyini göstərib.
2018-ci ilin oktyabrında 800 paytaxt sakini arasında keçirilən sorğuya qatılan respondentlərin 30%-i bir ayda ərzağa 300 lari (110 dollardan artıq), 34%-i 300-500 lari (110-187 dollar arası), 36%-i 500 laridən çox (187 dollar) vəsait xərclədiyini bildirib.
Sorğu iştirakçıları aylıq gəlirlərinin 1,2 min lari (460 dollar) təşkil etdiyini vurğulayıblar.
Statistikaya əsasən, son 10 ildə Gürcüstanda orta aylıq əməkhaqqı 368 laridən (136 dollar) 999 lariyə (370 dollar) qədər yüksəlib.
AST şirkəti MDB və Şərqi Avropa ölkələrini əhatə edir. Şirkətin Azərbaycan, Gürcüstan və Qazaxıstanda ofisləri var.
2019-cu ilin yanvar ayında Azərbaycanda əhalinin bir nəfərinə düşən orta pərakəndə ticarət dövriyyəsi 293,8 manat olub. Ticarət şəbəkəsində bir ölkə sakini orta hesabla ay ərzində 147,6 manatlıq (86,8 dollar) ərzaq məhsulları, içkilər və tütün məmulatları alıb.
Səidə Hüseynova
