Avropa İnsan Hüquqları Məhkəməsi gənc fəal İlkin Rüstəmzadənin Azərbaycana qarşı şikayəti üzrə qərarını elan edib.

Qərar İlkin Rüstəmzadənin 2013-cü ildə qaldırılan cinayət işi çərçivəsində həbsindən verdiyi şikayətə aiddir.

Avropa Məhkəməsinin qərarına görə, İlkin Rüstəmzadənin həbsi üçün əsaslı şübhə mövcud olmayıb. Məhbus fəalın Avropa İnsan Hüquqları Konvensiyası ilə verilmiş azadlıq və toxunulmazlıq hüququnun pozuntusu tanınıb, mənəvi zərərə görə 20 min avro, məhkəmə xərclərinə görə 2500 avro kompensasiya müəyyən edilib.

İlkin Rüstəmzadə 2013-cü ilin mayından həbsdədir. 8 il müddətinə azadlıqdan məhrum edilib. O, kütləvi iğtişaşların təşkili, qrup halında xuliqanlıq və ictimai asayişin pozulmasının qarşısını alan hakimiyyət nümayəndəsinə müqavimət göstərməklə xuliqanlıqda təqsirli bilinib.