Gənc fəal yenidən həbs olunub
Gənc fəal Rəfael Hüseynzadə yenidən inzibati qaydada 30 sutka həbs cəzası alıb.
Atası Füzuli Hüseynovun “Turan”a bildirdiyinə görə, fevralın 28-i axşam Rəfaeli Abşeron Rayon Polis İdarəsinə aparıblar.
Rəfaelin inzibati qaydada 30 sutka həbs olunduğunu da atasına həmin idarədən deyiblər. Həbsin səbəbini açıqlamayıblar.
Füzuli Hüseynov oğlunun cəzasını Abşeron Rayon Polis İdarəsində çəkdiyini söyləyib. O, inzibati qaydada həbs edilənlər üçün xüsusi məntəqə olduğu halda oğlunun rayon polis idarəsində saxlanmasına etiraz edib, bildirib ki, idarədəki saxlama kameraları uzunmüddətli həbs üçün nəzərdə tutulmayıb.
Füzuli Hüseynov və Rəfael Hüseynzadə təkbaşına aksiyalar keçirməklə tanınırlar. Füzuli Hüseynov bir neçə dəfə siyasi məhbsulara azadlıq tələbi ilə Bakıda təkbaşına aksiya keçirib və inzibati həbslərə məhkum edilib.
Rəfael Hüseynzadə də yanvarın 25-də siyasi məhbusların azadlığa buraxılması tələbi ilə paytaxtda təkbaşına etiraz aksiyası keçirib, buna görə tutulub və 30 sutka inzibati həbsə məhkum edilib. O, fevralın 24-də azadlığa çıxmışdı.
