Salome Zurabişvili Bakıdadır
Gürcüstanın prezidenti Salome Zurabişvili fevralın 27-də Azərbaycana rəsmi səfərə gəlib. AZƏRTAC xəbər verir ki, paytaxt Bakının beynəlxalq aeroportunda ali qonağı baş nazirin birinci müavini Yaqub Eyyubov, xarici işlər nazirinin müavini Nadir Hüseynov və digər rəsmi şəxslər qarşılayıb.
Ötən il noyabrın 28-də Gürcüstan prezidenti seçilən Salome Zurabişvili Cənubi Qafqazda ilk qadın dövlət başçısıdır.
1952-ci ildə Fransa paytaxtında anadan olan Salome Zurabişvili Paris Siyasi Elmlər İnstitutunu və ABŞ-ın Kolumbiya Universitetini bitirib. 1974-cü ildən Fransa Xarici İşlər Nazirliyi sistemində çalışıb.
2003-cü ildə Gürcüstana səfir göndərilən Salome Zurabişvili 2004-cü ildən bu ölkənin xarici işlər naziri olub. 2005-ci ildə nazir postundan gedən Salome Zurabişvili bir müddət ictimai hərəkat, sonra partiya lideri olub, 2016-cı ildə parlamentin deputatı seçilib.
2018-ci ilin prezident seçkisinə müstəqil namizəd kimi qoşulan Salome Zurabişvili hakim Gürcü Arzusu – Demokratik Gürcüstan Partiyasının dəstəyini alıb.
Salome Zurabişvili ötən il dekabrın 16-da səlahiyyətlərinin icrasına başlayıb.
