Qaçqınların və Məcburi Köçkünlərin İşləri üzrə Dövlət Komitəsi prezident İlham Əliyevin 26 fevral sərəncamının neçə nəfərə şamil olunacağını açıqlayıb. Həmin sənədlə məcburi köçkünlər və onlara bərabər tutulan şəxslər üçün vahid aylıq müavinətin məbləği 2019-cu il aprelin 1-dən 50 faiz artırılır.
Dövlət komitəsi bildirir ki, məcburi köçkünlər və onlara bərabər tutulan şəxslər üçün vahid aylıq müavinətin məbləği sıx müvəqqəti məskunlaşma yerlərində qazlaşdırma vəziyyətindən asılı olaraq adambaşına 22 və 40 manat məbləğində müəyyən olunub. Bu il aprelin 1-dən həmin məbləğlər müvafiq olaraq 33 və 60 manat təşkil edəcək.
Hazırda məcburi köçkünlərdən 81 min 476 nəfəri 22 manat, 415 min 81 nəfəri 40 manat məbləğində vahid aylıq müavinət alır.
