Fevralın 26-da prezident İlham Əliyev məcburi köçkünlər və onlara bərabər tutulan şəxslər üçün vahid aylıq müavinətin məbləğini 50 faiz artıran sərəncam imzalayıb. Yenilik  2019-cu il aprelin 1-dən qüvvəyə minir.

Novator.az bildirir ki, məcburi köçkünlər və onlara bərabər tutulan şəxslərə 40 manat məbləğində vahid aylıq müavinət müəyyən edilib. Fərdi qaydada sayğacların quraşdırılması və texniki istismarı mümkün olmayan sıx müvəqqəti məskunlaşma yerlərində faktiki yaşayan məcburi köçkünlərin istifadə etdikləri təbii qaz, elektrik enerjisi, su və məişət tullantılarının daşınmasına görə haqlar dövlət hesabına mərkəzləşmiş qaydada ödənir. Onlar üçün vahid aylıq müavinətin məbləği 22 manatdır.

Aylıq müavinət məcburi köçkün statusu olan bu şəxslərə verilir: ərazisi işğal olunmuş rayonda yaşayış yeri üzrə qeydiyyatda olub, ölkə ərazisində yaşayan, məcburi köçkün statusuna malik olan şəxslərə; hər iki valideyni məcburi köçkün statusuna malik olan uşaqlara; məcburi köçkün statusuna malik olan valideynlərindən birini və ya hər ikisini itirmiş, həmin valideynlər arasında nikah pozulduğu halda onlardan birinin himayəsində olan, yaxud həmin valideynlərin himayəsindən məhrum olmuş uşaqlara (belə uşaqların adından yalnız himayəsində olduqları valideyn, onların qəyyumları və ya himayəçiləri çıxış edirlər); məcburi köçkünlüyü yaradan hallardan əvvəl ərazisi işğal olunmuş rayon sakininə (məcburi köçkünə) ərə getmiş (nikahla və ya nikaha daxil olmadan), uşaqları olmuş, lakin işğal zamanı əvvəlki yaşayış yeri üzrə qeydiyyatdan çıxmayan, sonradan ərazisi işğal olunmuş rayonda ərinin yaşayış yeri üzrə qeydiyyata düşmüş qadınlara.