Prezident İlham Əliyev tələbə təqaüdləri ilə bağlı sənədlər imzalayıb. Sərəncama görə, ali təhsil müəssisələrində müvəffəqiyyət göstəriciləri əsasında dövlət hesabına maliyyələşən təqaüd yerlərinin sayı 2019-cu ilin martın 1-dən 16 min vahid artırılır. Dövlət başçısı təqaüd alan tələbələrin sayının tələbələrin ümumi sayına olan nisbətini hazırkı 31 faizdən 2019/2020-ci tədris ilində 45 faizə, 2020/2021-ci tədris ilindən başlayaraq 50 faizdən az olmayan səviyyəyə çatdırmağı tapşırıb.

Başqa bir sərəncama əsasən, dövlət büdcəsinin vəsaiti hesabına doktorantlara, ali təhsil, orta ixtisas və peşə təhsili müəssisələrində, həmçinin Azərbaycan Milli Elmlər Akademiyasının magistratura səviyyəsində təhsil alan tələbələrə təqaüdlər bu məbləğlərdə müəyyən edilir:

doktorantura pilləsi üzrə – elmlər doktoru hazırlığı üzrə doktorantlara 300 manat, fəlsəfə doktoru hazırlığı üzrə doktorantlara 180 manat;

ali təhsil müəssisələrində və Azərbaycan Milli Elmlər Akademiyasında – adlı təqaüd alan tələbələrə 170 manat;

magistratura səviyyəsi üzrə – akademik göstəriciləri 91-100 bal olan tələbələrə 145 manat, 71-100 bal olan tələbələrə 120 manat, 51-100 bal olan tələbələrə 80 manat;

bakalavriat səviyyəsi üzrə – akademik göstəriciləri 91-100 bal olan tələbələrə 130 manat, 71-100 bal olan tələbələrə 110 manat, 51-100 bal olan tələbələrə 75 manat;

orta ixtisas təhsili müəssisələrində – akademik göstəriciləri 91-100 bal olan tələbələrə 75 manat, 71-100 bal olan tələbələrə 60 manat, 51-100 bal olan tələbələrə 50 manat;

peşə təhsili müəssisələrinin tələbələrinə 50 manat.

Prezidentin imzaladığı fərman isə ali məktəb tələbələri üçün prezident təqaüdünün məbləğini 185 manatdan 210 manata qaldırır.

Sənədlərin hər üçü 2019-cu il martın 1-dən qüvvəyə minir.