Prezident İlham Əliyev Zahid Orucu Sosial Tədqiqatlar Mərkəzinin İdarə Heyətinin sədri təyin edib. Sərəncam fevralın 11-də imzalanıb.

Dövlət başçısının 8 fevral 2019-cu il fərmanı ilə yaradılan Sosial Tədqiqatlar Mərkəzi ictimai münasibətlərin inkişaf dinamikasını sistemli təhlil edən, bu sahədə mövcud tendensiyaları müəyyənləşdirən və dəyişiklikləri proqnozlaşdıran, həmin dəyişikliklərin cəmiyyətə mümkün təsirlərini araşdıran, müasir informasiya texnologiyaları və elmi yanaşmalar tətbiq edilməklə ictimai fikrin öyrənilməsini və sosial tədqiqatlar aparılmasını təmin edən, həyata keçirdiyi elmi-analitik təhlilin nəticələrini dövlət orqanlarına təqdim edən publik hüquqi şəxsdir. Mərkəzə ümumi rəhbərliyi və nəzarəti həyata keçirəcək İdarə Heyətinin üç üzvdən ibarət olması qərara alınıb.

Novator.az bildirir ki, Zahid Oruc 1972-ci il fevralın 1-i Gədəbəy rayonunun Əli İsmayıllı kəndində doğulub. Azərbaycan Texniki Universitetinin avtomatika və hesablama texnikası fakültəsini bitirib. Ana Vətən Partiyasının üzvü, partiya sədrinin müavini olub. 2001-ci ildən Milli Məclisin deputatıdır.

Qanuna əsasən, publik hüquqi şəxs ümumdövlət və (və ya) ictimai əhəmiyyət daşıyan fəaliyyətlə məşğul olan, dövlət və ya bələdiyyə orqanı olmayan təşkilatdır. Publik hüquqi şəxsin nizamnamə fondu təsisçinin verdiyi əmlak hesabına formalaşdırılır. Onun əmlakı təsisçilərin verdiyi digər əmlakdan, habelə dövlət və ya yerli büdcələrdən ayrılan vəsaitlərdən, fəaliyyət istiqamətlərinə uyğun olaraq görülən işlərdən, göstərilən xidmətlərdən əldə edilən daxilolmalardan, ianələrdən, qrantlardan və nizamnamədə müəyyən edilmiş digər mənbələrdən daxil olan vəsaitlərdən formalaşa bilər.

Bu yaxınlarda dövlət başçısı Beynəlxalq Münasibətlərin Təhlili Mərkəzinin yaradılmasına da fərman verib. Fevralın 6-da imzalanan sənədə görə, Beynəlxalq Münasibətlərin Təhlili Mərkəzi dünyada və regionda baş verən prosesləri təhlil edən, Dağlıq Qarabağ münaqişəsinin müxtəlif aspektləri, beynəlxalq münasibətlər və təhlükəsizlik məsələləri ilə bağlı fundamental araşdırmalar aparan, ölkənin bu məsələlərə dair mövqeyini beynəlxalq ictimai, siyasi və akademik dairələrə çatdıran, Azərbaycanın dövlət orqanlarını həyata keçirdiyi elmi-analitik təhlilin nəticələri ilə təmin edən publik hüquqi şəxsdir.