Pensiyanın artım faizi bilindi
Dövlət Statistika Komitəsi iqtisadiyyatda işləyənlərin sayı və əməkhaqqı barədə hesabat yayıb. Novator.az bildirir ki, hesabata görə, 2019-cu il yanvarın 1-nə Azərbaycan iqtisadiyyatında muzdla çalışan işçilərin sayı 1 milyon 548,9 min nəfər olub, onların 883,9 min nəfəri dövlət sektorunda, 665 min nəfəri qeyri-dövlət sektorunda fəaliyyət göstərib. Muzdla çalışan işçilərin orta aylıq nominal əməkhaqqının əvvəlki ilə nisbətən 3 faiz artaraq 544,1 manata çatdığı vurğulanır.
Azərbaycan qanunvericiliyi əmək pensiyalarının ildə bir dəfə orta aylıq nominal əməkhaqqının artım tempinə uyğun indeksləşdirilməsini nəzərdə tutur. Proses Dövlət Statistika Komitəsindən Əmək və Əhalinin Sosial Müdafiəsi Nazirliyinə təqdim olunan rəsmi bilgi əsas götürülməklə həyata keçirilir. Ötən ilin yekun göstəricisi əsasında pensiyalar 3 faiz artmalıdır. Prezident İlham Əliyevin 7 fevral sərəncamına əsasən, Əmək və Əhalinin Sosial Müdafiəsi Nazirliyi 2018-ci il üzrə orta aylıq nominal əməkhaqqının illik artım tempinə uyğun olaraq bütün növ əmək pensiyalarının sığorta hissəsinin artırılmasını təmin etməli; fərdi uçot sistemində fərdi hesabların sığorta hissəsində toplanmış pensiya kapitalı məbləğlərinin indeksləşdirilməsini həyata keçirməlidir. Artımın 2019-cu il yanvarın 1-dən hesablanması tapşırılıb.
