Fevralın 8-i prezident İlham Əliyev minimum aylıq əməkhaqqının artırılması barədə sərəncam imzalayıb.

Sərəncama əsasən, martın 1-dən minimum aylıq əməkhaqqının məbləği 180 manat müəyyən edilir.

Hazırda minimum aylıq əməkhaqqının məbləği 130 manatdır.

Əmək və Əhalinin Sosial Müdafiəsi Nazirliyinin yaydığı məlumata görə, minimum əməkhaqqının artımı ölkədə 600 minədək insanı əhatə edəcək. Onlardan dövlət sektorunda işləyən 450 min nəfərin əmək haqqında 30 faiz, özəl sektorda işləyən 150 min nəfərin əmək haqqında isə 25 faiz artım olacaq.

Minimum əməkhaqqının artırılması ilə bağlı dövlət büdcəsindən illik 400 milyon manat, 2019-cu il üzrə isə (10 ay ərzində) 335 milyon manata qədər əlavə vəsait yönəldiləcək.

Əmək qanunvericiliyinə əsasən, əməkhaqqı – müvafiq iş vaxtı ərzində əmək funksiyasını yerinə yetirmək üçün əmək müqaviləsi ilə müəyyən edilmiş, işçinin gördüyü işə (göstərdiyi xidmətlərə) görə işəgötürən tərəfindən pul və ya natura formasında ödənilən gündəlik və ya aylıq məbləğ, habelə ona edilən əlavələrin, mükafatların və digər ödənclərin məcmusudur.

İşçilərə dövlətin müəyyən etdiyi minimum əməkhaqqının miqdarından az əməkhaqqı verilməsi qanunla qadağandır.