Rusiyanın baş naziri Rüstəm İbrahimbəyovu təbrik etdi
Rusiyanın baş naziri Dmitri Medvedyev yazıçı-dramaturq, kinorejissor və ssenarist Rüstəm İbrahimbəyovu 80 illik yubileyi münasibətilə təbrik edib. Novator.az-ın məlumatına görə, təbrik teleqramı fevralın 5-də Rusiya hökumətinin rəsmi portalında yerləşdirilib. Teleqramda Rüstəm İbrahimbəyovun ədəbi istedadına yüksək qiymət verilir və insan kimi müdrikliyinin qiymətli olduğu vurğulanır.
Rüstəm İbrahimbəyov 1939-cu il fevralın 5-də Bakıda anadan olub. Azərbaycan Neft və Kimya İnstitutunu bitirib, sonralar Moskvada Rusiya Dövlət Kinematoqrafiya İnstitutunda ssenarist və rejissor ixtisaslarına yiyələnib. Onlarla bədii film, televiziya filmi və tamaşaların, bədii əsərlərin müəllifidir. Amerika Kino Akademiyasının “Oskar” mükafatına və digər mükafatlara layiq görülüb.
Azərbaycanın xalq yazıçısı, “Şöhrət” ordeni laureatı, Rusiyanın əməkdar incəsənət xadimidir.
Rüstəm İbrahimbəyov Rusiyanın paytaxtı Moskvada yaşayır. 2009-cu ildən bəri Rüstəm İbrahimbəyov Azərbaycan hakimiyyətini sərt tənqid etdiyi üçün rəsmi dairələrin təzyiqlərinə məruz qalır.
