Maliyyə Monitorinqi Xidmətinin yeni səlahiyyətləri rəsmiləşib. Prezident İlham Əliyevin fevralın 4-də imzaladığı sənədlərlə bu qurum narkotik vasitələrin, psixotrop maddələrin və onların prekursorlarının qanunsuz dövriyyəsinə və narkomanlığa qarşı mübarizəyə dair dövlət proqramı; insan hüquqlarının müdafiəsi üzrə milli fəaliyyət planı; insan hüquq və azadlıqlarının müdafiəsinin səmərəliliyini artırmaq sahəsində milli fəaliyyət proqramı; insan alverinə qarşı mübarizəyə dair milli fəaliyyət planı; cinayət yolu ilə əldə edilmiş pul vəsaitlərinin və ya digər əmlakın leqallaşdırılmasına və terrorçuluğun maliyyələşdirilməsinə qarşı mübarizəyə dair milli fəaliyyət planı; ortamüddətli xərclər çərçivəsinin hazırlanması qaydası üzrə icraçı orqan statusu alır.

Novator.az bildirir ki, Maliyyə Monitorinqi Xidməti ötən il mayın 25-də yaradılıb, cinayət yolu ilə əldə edilmiş pul vəsaitlərinin və ya digər əmlakın leqallaşdırılmasının və terrorçuluğun maliyyələşdirilməsinin qarşısını almaq sahəsində vahid tənzimləməni və nəzarəti həyata keçirən, fəaliyyəti əlaqələndirən və dövlət büdcəsindən maliyyələşən publik hüquqi şəxsdir.

Xidmətin idarəetmə orqanı İdarə Heyətidir. İdarə Heyətinin tərkibi üç üzvdən – sədrdən və onun iki müavinindən ibarətdir. Onları prezident vəzifəyə təyin edir.

Maliyyə Monitorinqi Xidmətinin pul vəsaitləri və ya digər əmlakla əməliyyat aparılmasını dayandırmaq, müvafiq sahədə icrası məcburi olan qərarlar qəbul etmək və göstərişlər vermək hüququ var.