Teref.info saytının baş redaktoru Nurəddin Xoca (Nurəddin İsmayılov) barəsində cinayət işinin ibtidai istintaqı yekunlaşıb.

“Report”un xəbərinə görə, iş baxılması üçün Bakı Ağır Cinayətlər Məhkəməsinə göndərilib və hakim Zeynal Ağayevin icraatına verilib.

Məhkəmənin hazırlıq iclası fevralın 11-nə təyin edilib.

Nurəddin Xoca vəzifə səlahiyyətlərini aşmaqda, vəzifə saxtakarlığında və Teref.info saytında dövlət əleyhinə açıq çağırışlar etməkdə (Cinayət Məcəlləsinin 281.2, 309 və 313-cü maddələri) ittiham olunur.

1957-ci il təvəllüdlü Nurəddin Xoca vaxtilə Qarabağ müharibəsinin iştirakçısı olub, döyüşlərdə “Bozqurd” adlı batalyona komandirlik edib.

Teref.info saytına giriş 2018-ci ildə Nəqliyyat, Rabitə və Yüksək Texnologiyalar Nazirliyi yanında Elektron Təhlükəsizlik Mərkəzinin iddiası, Səbail Rayon Məhkəməsinin qərarı əsasında məhdudlaşdırılıb.