Nazirlər Kabineti Bakı Şəhər İcra Hakimiyyəti başçısının tabeliyində təsərrüfat hesablı “Bakı Şəhər Əsaslı Tikinti və Təmir” Məhdud Məsuliyyətli Cəmiyyətinin yaradılmasına qərar verib. Novator.az-ın məlumatına görə, fevralın 5-də imzalanan qərarla “Bakı Şəhər Əsaslı Tikinti və Təmir” Məhdud Məsuliyyətli Cəmiyyətinin işçilərinin say həddi 16 ştat vahidi müəyyən edilir.

Əmlak Məsələləri Dövlət Komitəsi “Bakı Şəhər Əsaslı Tikinti və Təmir” Məhdud Məsuliyyətli Cəmiyyətinin nizamnaməsinin təsdiqi və dövlət qeydiyyatına alınması üçün zəruri tədbirlərin həyata keçirilməsini təmin etməlidir.

Bakı Şəhər İcra Hakimiyyətinin başçısı postunu ötən il noyabrın 15-dən Eldar Əzizov tutur. O, 1999-cu ildən Bakı Şəhər İcra Hakimiyyətində xarici əlaqələr və investisiya proqramları departamenti sədrinin birinci müavini, 2000-ci ilin mart ayından Bakı Şəhər İcra Hakimiyyəti başçısının müavini postlarında çalışıb.

2000-ci ilin iyun ayından Nizami Rayon İcra Hakimiyyətinin (Bakı) başçısı, 2003-2011-ci illərdə Gəncə Şəhər İcra Hakimiyyətinin, 2011-2015-ci illərdə Sumqayıt Şəhər İcra Hakimiyyətinin, 2015-ci ilin sentyabr ayından Səbail Rayon İcra Hakimiyyətinin başçısı olub.

Ötən il iyulun 16-da Eldar Əzizov Bakı Şəhər İcra Hakimiyyəti başçısının müavini təyin olunub, həmin vaxtdan başçının səlahiyyətlərini də icra edib.