Azərbaycanlı jurnalist Ermənistana səfər edib
“Turan” informasiya agentliyinin redaktoru Şahin Hacıyev Ermənistana səfər edib. Novator.az bildirir ki, Ermənistanın Panarmenian.net saytı fevralın 5-də belə məlumat yayıb.
Panarmenian.net-in məlumatında Ermənistan Xarici İşlər Nazirliyinin mətbuat katibi Anna Naqdalyana istinad olunur. Qeyd edilir ki, azərbaycanlı jurnalistin Ermənistana səfəri barədə ölkə prezidentinin müşaviri Tevan Poqosyan da açıqlama yayıb. Özünün “Facebook” saytında Şahin Hacıyevlə birgə fotosunu yerləşdirən müşavir jurnalistə müsahibə verdiyini vurğulayıb.
“Turan”ın 5 fevral məlumatına görə, Şahin Hacıyev fevralın 1-də Ermənistana ezamiyyətə göndərilib. Fevralın 5-dək davam edən səfərin Azərbaycanın müvafiq orqanları ilə razılaşdırıldığı, Şahin Hacıyevin paytaxt Yerevanda siyasi partiya təmsilçiləri və ekspertlərlə görüşüb Qarabağ münaqişəsi və bölgədəki vəziyyət barədə söhbətlər apardığı bildirilir.
Şahin Hacıyevin Yerevan səfərindən hazırladığı materialların Turan.az və Contact.az saytlarında dərc olunacağı vurğulanır.
