Fevralın 1-i Bakı Konqres Mərkəzində Azərbaycan Gəncləri Gününə həsr olunmuş toplantı keçirilib. AZƏRTAC xəbər verir ki, prezident İlham Əliyev tədbirə qatılaraq nitq söyləyib.

Gənclər Günü münasibətilə təbriklərini çatdıran İlham Əliyev bu günün mərhum prezident Heydər Əliyevin təşəbbüsü ilə təsis edildiyini xatırladıb. Dövlət başçısı Azərbaycanda müasir gənclər siyasətinin 1994-cü ildən başladığını, həmin il Gənclər və İdman Nazirliyi yaradıldığını və bunun da gənclər üçün imkanlar açdığını vurğulayıb.

İlham Əliyev ölkədə gənclərlə bağlı dövlət proqramlarının qəbul olunduğunu, müxtəlif mötəbər beynəlxalq tədbirlərin keçirildiyini bildirib, bölgələrdə gənclər mərkəzlərinin, olimpiya idman komplekslərinin açıldığını qeyd edib.

Müstəqillik dövründə yaşamağın gənclər üçün böyük xoşbəxtlik olduğunu vurğulayan dövlət başçısı ölkənin hərtərəfli inkişafında gənclərin roluna toxunub, onların cəmiyyətin fəal üzvləri olduğunu deyib. Prezident bildirib ki, Azərbaycan gəncləri peşəkar olmalı, milli və vətənpərvərlik ruhunda tərbiyə almalıdırlar.

İlham Əliyev Azərbaycanın beynəlxalq nüfuzunun artdığını vurğulayıb, Dağlıq Qarabağ münaqişəsi ilə bağlı hüquqi, siyasi və digər cəhətlərdən mövqelərinin möhkəmləndiyini qeyd edib.