İşsizlərə ödənişin orta məbləği nə qədərdir?
2019-cu il yanvarın 1-nə iqtisadi fəal əhalinin sayı 5 milyon 133,1 min nəfər olub, onların 4 milyon 879,3 min nəfərini məşğul əhali təşkil edib.
Novator.az-ın məlumatına görə, Dövlət Statistika Komitəsi bildirir ki, məşğulluq xidməti orqanları ölkə üzrə 20,1 min nəfərə rəsmi işsiz statusu verib. İşsizlikdən sığorta ödənişinin orta məbləği 196 manat göstərilir.
Hesabata əsasən, 2018-ci ildə müəssisə və təşkilatların sayı 9,9 faiz artaraq 130 min 323-ə çatıb. Qeydiyyatda olan müəssisə və təşkilatların 55,5 faizi Bakıda yerləşib.
2019-cu il yanvarın 1-nə hüquqi şəxs yaratmadan sahibkarlıq fəaliyyəti ilə məşğul olanların sayı 842 mini keçib.
Ötən il iqtisadi və sosial sahələrin inkişafı üçün əsas kapitala 17 milyard 238,2 milyon manat vəsait yönəldilib. Daxili mənbələrdən əsas kapitala yönəldilmiş vəsait ümumi sərmayənin 69,7 faizini təşkil edib. Xarici ölkələr və beynəlxalq təşkilatların əsas kapitala yönəltdiyi vəsaitin 4 milyard 313,5 milyon manatı Böyük Britaniya, İsveçrə, Türkiyə, Malayziya, ABŞ, Yaponiya, İran, Rusiya, Çexiya və Norveç sərmayədarlarına məxsus olub.
