Çirkli hava səhv qərarlara gətirir
ABŞ-ın Massaçusets Texnologiya İnstitutunun alimləri havanın insanın qəbul etdiyi qərarlara təsirini üzə çıxarıblar. Novator.az-ın məlumatına görə, alimlər hesab edir ki, ruh yüksəkliyi olmadıqda insan düşünülməmiş və səhv qərarlar verə bilər.
Tədqiqat göstərib ki, havanın çirklilik səviyyəsi yüksək olan günlərdə insanlar əzgin və həyəcanlı olduqları üçün özlərini impulsiv aparırlar və riskə gedirlər. Mütəxəssislərin tədqiqatı Çinin bir sıra şəhərlərində çirklənmə səviyyəsi haqda məlumatların müqayisəsinə və “Sina Weibo” sosial şəbəkəsində hava barədə məlumatlarla bağlı ifadə olunan emosiyalara əsaslanıb.
Tədqiqata əsasən, çox çirkli hava qadınların və yüksək gəlirli insanların xoşbəxtlik göstəricisini daha çox aşağı salıb. Ona görə də ekspertlər yaşayış yerini seçərkən diqqətli olmağı, üz maskalarından, havatəmizləyici sistemdən istifadə etməyi və havanın çirklilik səviyyəsi yuxarı olduqda küçəyə tez-tez çıxmamağı tövsiyə edirlər.
Səidə Hüseynova
