Milli Şuranın mitinqinə icazə verildi
Bakı Şəhər İcra Hakimiyyəti müxalifətin bir hissəsini birləşdirən Demokratik Qüvvələrin Milli Şurasının mitinqlə bağlı müraciətini müsbət cavablandırıb.
Mitinq yanvarın 19-u saat 15-dən 17-dək Bakının Yasamal rayonundakı İdman-Sağlamlıq Kompleksinin stadionunda (metronun “İnşaatçılar” stansiyasının yanı) olacaq.
Aksiyanın başlıca tələbi bloqçu Mehman Hüseynovun və adı bəzi hüquq müdafiəçilərinin siyasi məhbus siyahısında keçən başqa şəxslərin azad edilməsidir.
Bəzi hüquq müdafiəçiləri Azərbaycanda 150 nəfərdən çox şəxsi siyasi məhbus sayır. Onlardan biri olan Mehman Hüseynov 2017-ci il martın 3-dən həbsdədir. O, polisə ağır cinayət ittihamı ilə böhtan atmaqda təqsirli bilinərək 2 il müddətinə azadlıqdan məhrum olunub.
2018-ci il dekabrın 26-da ona hakimiyyət nümayəndəsinə xidməti vəzifələrini yerinə yetirərkən həyat və sağlamlıq üçün təhlükəli olan zor tətbiq etməklə müqavimət göstərmə ittihamı ilə yeni cinayət işi açılıb. Bu ittiham 3 ildən 7 ilədək müddətə azadlıqdan məhrumetmə cəzasını nəzərdə tutur.
Yeni cinayət işinin istintaqı ilə əlaqədar Mehman Hüseynov dekabrın sonlarında 14 saylı Cəzaçəkmə Müəssisəsindən Bakı İstintaq Təcridxanasına köçürülüb.
