Yanvarın 14-də korrupsiyaya qarşı mübarizə sahəsində ötən il görülmüş işlərlə bağlı mətbuat konfransı keçirilib. Mətbuat konfransında danışan baş prokurorun müavini, Korrupsiyaya Qarşı Mübarizə Baş İdarəsinin rəisi Kamran Əliyev deyib ki, ötən il vətəndaşların 8058 müraciətinə baxılıb, 310 cinayət xarakterli material araşdırılıb: “Həmin materialların 222-si üzrə cinayət işi başlanıb, 88 material üzrə digər prokuror təsir aktları tətbiq edilməklə 61 nəfər vəzifəli şəxs intizam məsuliyyətinə cəlb olunub.
“161-Qaynar xətt” əlaqə mərkəzinə 3854 müraciət daxil olub, həmin müraciətlərin 19-u üzrə cinayət işləri başlanıb. Əməliyyat tədbirləri nəticəsində 25 şəxs cinayət başında yaxalanıb, korrupsiya hüquqpozmaları barədə əldə edilmiş məlumatlar əsasında 24 cinayət işi açılıb.
2018-ci ildə 431 şəxs barəsində 278 cinayət işinin istintaqı tamamlanaraq məhkəmələrə göndərilib. 68 iş mənimsəmə və israf etmə, 55 iş dələduzluq, 21 iş vəzifə səlahiyyətlərindən sui-istifadə etmə, 13 iş rüşvət alma (passiv rüşvətxorluq), 36 iş rüşvət vermə (aktiv rüşvətxorluq) və şəxsi rüşvət verməyə təhrik etmə, qalanları digər korrupsiya cinayətləri ilə bağlıdır.
İbtidai araşdırma mərhələsində 120 milyon manat məbləğində maddi ziyanın 53,3 milyon manatı ödənib, 34,2 milyon manat dəyərində qiymətləndirilən əmlak üzərinə həbs qoyulmaqla ümumilikdə vurulmuş maddi ziyanın 73 faizinin ödənilməsi təmin edilib.
Törədilmiş və ya hazırlanan korrupsiya ilə əlaqədar hüquqpozmalara dair baxılmış məlumatlar üzrə araşdırma müddətində 2,6 milyon manat məbləğində maddi ziyanın ödənilməsi təmin olunub.
Vəzifəli şəxslərin hərəkətlərində aşkar edilmiş cinayət xarakterli olmayan hüquqpozmalar üzrə 25 vəzifəli şəxs xəbərdarlıq, 16 vəzifəli şəxs töhmət, 3 vəzifəli şəxs şiddətli töhmət növündə intizam məsuliyyətinə cəlb edilib, 17 nəfər vəzifəsindən çıxarılıb. Qanun pozuntularının aradan qaldırılması və gələcəkdə təkrarlanmaması məqsədi ilə müxtəlif dövlət qurumlarına və vəzifəli şəxslərə 157 təqdimat göndərilib.
2018-ci il ərzində Dövlət Gömrük Komitəsindən 17, Vergilər Nazirliyindən 7, Ekologiya və Təbii Sərvətlər Nazirliyindən 21, Qida Təhlükəsizliyi Agentliyindən 8, Dövlət Şəhərsalma və Arxitektura Komitəsindən 6, məhkəmələrdən 22 material daxil olub, 43 material üzrə cinayət işi başlanıb”.
Xəbəri Baş Prokurorluq yayıb.
