Qarabağ Komitəsinin 9 yanvar toplantısında yeni qərarlar verilib. Əsasnamədə dəyişikliklə İdarə Heyəti yaradılıb. Novator.az-ın məlumatına görə, Pənah Hüseyn, İsgəndər Həmidov, Mirmahmud Mirəlioğlu, İlham İsmayıl, Akif Nağı, Tural Abbaslı, Əvəz Zeynallı, Sahib Kərimli, Taleh Əliyevin daxil olduğu İdarə Heyəti Qarabağ Komitəsinə yeni üzvlər qəbul etmək səlahiyyəti alıb.

Komitənin analitik qrupunun yaradılması qərarı qəbul edilib, İdarə Heyətinə konkret istiqamətlər üzrə komissiyalar formalaşdırmaq təklifləri hazırlamaq tapşırılıb.

Başqa bir qərara əsasən, yanvarın 24-ü Bakıda, Klassik Xalq Cəbhəsi Partiyasının qərargahında “Qarabağ cəbhəsində atəşkəs rejiminin hərbi-siyasi və beynəlxalq-hüquqi məzmunu” mövzusunda dəyirmi masa keçiriləcək.

Bir qrup ictimai-siyasi xadimin ötən il yaratdığı Qarabağ Komitəsinə əvvəlcə Qarabağ Azadlıq Təşkilatının başçısı Akif Nağı, sonra müharibə veteranı, ictimai xadim İlham İsmayıl sədrlik edib. Hazırda sədr postunu Ağ Partiyanın başqanı Tural Abbaslı tutur.