Belçika: varlı kasıbdan nə qədər çox yaşayır?
Belçikanın Luven Katolik Universitetinin alimləri əhalinin həyat səviyyəsinin ömür uzunluğuna təsirini araşdırıblar.
Novator.az bildirir ki, tədqiqat zamanı 1991-ci ildən 2016-cı ilə qədər milli reyestrdə qeydiyyata alınmış belçikalıların fərdi məlumatları müqayisə olunub. Mütəxəssislər 1991, 2001 və 2011-ci illər üzrə siyahıyaalınmanın yekunlarını və ölüm haqqında şəhadətnamə arxivini nəzərdən keçirərək sosial qruplar arasındakı ömür uzunluğu fərqini üzə çıxarıblar. Tədqiqata əsasən, yoxsul qadınlar varlılara nisbətən 6,6 il, yoxsul kişilər isə imkanlılara nisbətən 9,1 il daha az ömür sürür.
Alimlərin qənaətinə görə, sosial-iqtisadi durumu, mənzil şəraiti daha yaxşı olan, yaxşı təhsil almış insanlar çox zaman əhalinin yoxsul təbəqəsinin nümayəndələrinə nisbətdə 10 il çox yaşayır.
Səidə Hüseynova
