Rusiyalıların mühacirlərə münasibəti necədir?
Ümumrusiya İctimai Rəyi Öyrənmə Mərkəzi əhalinin mühacirlərə münasibətini araşdırıb. Novator.az-ın məlumatına görə, sorğu dekabrın 16-da 18 yaşdan yuxarı 1600 nəfər arasında aparılıb.
Nəticələrə əsasən, respondentlərin 51%-i mühacirlərin ölkədə cinayətlərin çoxalmasına, 49%-i əmək bazarında rəqabətin artmasına səbəb ola biləcəyini düşünür.
Rusiyalıların 48%-i hesab edir ki, gəlmələr aşağı ixtisaslı və az maaşlı sahələrdə işçi qüvvəsi çatışmazlığını aradan qaldırır.
Respondentlərin 50%-i ölkəyə rusların və rusdilli mühacirlərin cəlb olunması ideyasını dəstəkləyir. Onlar gənc və təhsilli vətəndaşların gəlişini arzulayır, əmək qabiliyyəti olmayan və aşağı təhsilli mühacirlərin axınına məhdudiyyət qoyulmasını istəyirlər.
Rusiyalı respondentlərin mühacir axınına müsbət münasibəti reytinqinin ilk pillələrində Belarus (25%), Ukrayna (21%), Almaniya (16%) və Qazaxıstan (15%) vətəndaşları dayanır.
Tacikistan (15%), Özbəkistan (14%), Ukrayna (13%), ABŞ (11%) və Çinin (9%) nümayəndələri arzuolunmaz mühacirlər sırasında qərarlaşıb.
Səidə Hüseynova
