Baş nazir Novruz Məmmədovun sədrliyi ilə Dövlət Neft Fondunun Müşahidə Şurasının iclası keçirilib. Nazirlər Kabinetinin 19 dekabr məlumatına görə, iclasda Dövlət Neft Fondunun 2019-cu il üçün büdcə layihəsinə baxılıb.

2019-cu ildə Dövlət Neft Fondunun büdcəsinin baza göstəricisi olan 1 barrel neftin ortaillik ixrac qiyməti 60 ABŞ dolları səviyyəsində götürülüb. Bu göstəriciyə uyğun olaraq fondun büdcə gəlirlərinin ümumi həcminin 15 milyard 450,1 milyon manat, büdcə xərclərinin 11 milyard 595,2 milyon manat təşkil etməsi proqnozlaşdırılır.

Xərclərin strukturunda məcburi köçkünlərin sosial-məişət və məskunlaşma məsələləri ilə əlaqədar tədbirlərin maliyyələşdirilməsi xərcləri 200 milyon manat, dövlət büdcəsinə transfertin yuxarı həddi 11 milyard 364,3 milyon manat, fondun idarə edilməsi ilə bağlı xərclər 30,9 milyon manat məbləğində göstərilir.

Layihə məqbul sayılıb. Təsdiq prezidentin səlahiyyətindədir .