Əhalinin siyahıyaalınması: sorğu 28 bənddən ibarət olacaq
Dekabrın 11-i Nazirlər Kabinetində Əhalinin Siyahıyaalınmasına Yardım üzrə Mərkəzi Komissiyanın iclası keçirilib. AZƏRTAC xəbər verir ki, baş nazirin müavini, komissiyanın sədri Əli Həsənovun yanında keçirilən iclasa müvafiq dövlət qurumlarının rəsmiləri qatılıb.
Azərbaycanda əhalinin siyahıyaalınması 1-10 oktyabr 2019-cu ilə təyin edilib. Siyahıyaalınma ilə bağlı hazırlıq işlərinin görülməsi və onun keçirilməsi, yekunlarının işlənməsi, nəticələrinin dərc edilərək yayılması Dövlət Statistika Komitəsinə həvalə olunub. Nazirlər Kabinetinin qərarı ilə əhalinin siyahıyaalınmasına hazırlıq və onun keçirilməsi ilə bağlı mərkəzi və yerli icra hakimiyyəti orqanlarının, idarə, müəssisə və təşkilatların fəaliyyətlərinin əlaqələndirilməsi məqsədilə Əhalinin Siyahıyaalınmasına Yardım üzrə Mərkəzi Komissiya yaradılıb.
11 dekabr iclasında bildirilib ki, əhalinin siyahıyaalınmasına hazırlıq prosesinə 43 min insan cəlb olunub, sorğu vərəqələri hazırlanıb. 28 bənddən ibarət sorğuda 180 göstərici yer alır.
Novator.az bildirir ki, Azərbaycanda əhali sonuncu dəfə 2009-cu il aprelin 13-dən 22-dək siyahıya alınıb. Həmin siyahıyaalmada əhalinin milli tərkibi belə göstərilib:
azərbaycanlılar – 91,6 faiz
ləzgilər – 2 faiz
talışlar – 1,3 faiz
ruslar – 1,3 faiz
ermənilər – 1,3 faiz
avarlar – 0,6 faiz
türklər – 0,4 faiz
tatarlar – 0,3 faiz
tatlar – 0,3 faiz
ukraynalılar – 0,3 faiz
kürdlər – 0,1 faiz
saxurlar – 0,1 faiz
gürcülər – 0,1 faiz
yəhudilər – 0,1 faiz
qrızlar – 0,04 faiz
udinlər – 0,04 faiz
xınalıqlar – 0,02 faiz
digər millətlər – 0,1 faiz.
