Rusiyalılar Qərb və Ukrayna barədə nə düşünür?
Rusiyanın “Levada” sorğu mərkəzi əhalinin ABŞ-a və Avropaya münasibətini araşdırıb. Novator.az-ın məlumatına görə, noyabrın 22 dən 28-nə qədər 1600 nəfər arasında aparılan sorğuya qatılan respondentlərin 33%-i Qərbin Rusiyaya qarşı siyasi və iqtisadi sanksiyalarından çox da narahat olmadığını deyib.
Arayışa əsasən, 2017-ci ildə 40% belə qənaətdə olub.
Sorğu Qərbin sanksiyalarından çox narahat olanların 2017-ci illə müqayisədə 7%-dən 20%-ə yüksəldiyini göstərib.
Respondentlərin 23%-i sanksiyalardan qətiyyən narahat olmadığını deyib.
Ukraynaya münasibətə görə Rusiyanın beynəlxalq təcridə məruz qalmasından narahatlıq ifadə edənlərin sayı 2017-ci ilə nisbətdə 8%-dən 21%-ə qalxıb. Bu məsələdən bir o qədər də narahat olmayanların sayı isə 44%-dən 33%-ə enib.
Nəticələrə əsasən, respondentlərin 43%-i Rusiyanın ABŞ və digər Qərb ölkələri ilə münasibətləri düzəltməsinə tərəfdar olduğunu qeyd edib, 16%-i bunun əleyhinə çıxıb.
Rusiyalıların 36%-i ABŞ və Avropa ilə əlaqələrin qurulmasının vacib olduğunu düşünür. Bir il əvvəl belə düşünənlər 24% təşkil edib.
Sorğu il ərzində rusiyalıların əksəriyyətinin Qərb ölkələrinə mənfi münasibətinin dəyişmədiyini üzə çıxarıb. Respondentlərin 57%-i ABŞ-a mənfi və çox mənfi, 49%-i Avropa İttifaqı ölkələrinə mənfi münasibətini açıqlayıb.
Ukraynaya mənfi və çox mənfi münasibətdə olduğunu deyənlər isə 60% həddində göstərilir.
ABŞ və başqa Qərb ölkələri Rusiyaya 2014-cü ildən – bu ölkə Ukrayna torpaqlarını işğal edəndən sanksiyalar qoyur.
Səidə Hüseynova
