Qətər OPEK-dən çıxır
Qətər iri neft ixracatçılarını birləşdirən OPEK-dən çıxır. Novator.az-ın məlumatına görə, ölkənin energetika məsələləri üzrə dövlət naziri bu qərarı Qətərin daha çox qaz ixracı və sıxılmış təbii qaz istehsalına yönəlmək arzusu ilə əsaslandırıb. Nazir Qətərin 1961-ci ildən üzv olduğu OPEK-dən 2019-cu il yanvarın 1-də ayrılacağını vurğulayıb və qeyd edib ki, qərar sırf iqtisadi xarakter daşıyır, təşkilat üzvləri ilə hansısa ziddiyyətlərlə bağlı deyil.
1960-cı ildə yaradılmış OPEK-ə Qətərlə yanaşı 14 ölkə daxildir: Anqola, Birləşmiş Ərəb Əmirlikləri, Ekvador, Ekvatorial Qvineya, Əlcəzair, İraq, İran, Konqo, Küveyt, Qabon, Liviya, Nigeriya, Səudiyyə Ərəbistanı, Venesuela. Dünyanın neft ehtiyatlarının üçdə ikisi, hasilatın 45 faizi və ixracın yarısı OPEK ölkələrinin payına düşür.
2016-cı il noyabrın 30-da OPEK üzrə gündəlik neft hasilatının 1,2 milyon barrel azaldılaraq 32,5 milyon barrelə endirilməsi barədə razılıq əldə olunub. Dekabrın 10-da isə Vyanada OPEK üzvləri ilə təşkilata daxil olmayan bəzi ölkələr, o cümlədən Azərbaycan ümumi hasilatın sutkada 558 min barrel azaldılması barədə sazişə imza atıb. 2017-ci il mayın 25-də həmin sazişin müddətinin 2018-ci il aprelin 1-dək, 2017-ci il noyabrın 30-da 2019-cu il yanvarın 1-dək uzadılması barədə razılıq əldə olunub.
OPEK+ sazişinin iştirakçıları iyunun 23-ü Vyanada gündəlik hasilatı ümumilikdə 1 milyon barrel artırmaq barədə razılığa gəliblər. Razılaşma iyulun 1-dən tətbiq olunur.
Azərbaycanın energetika naziri Pərviz Şahbazov dekabrın 6-sı Avstriyanın paytaxtı Vyanada OPEK-in Nazirlər Şurasının iclasında iştirak edəcək. İclasda OPEK üzrə hasilatın azaldılması ilə bağlı qərar qəbulu gözlənir.
