UEFA-nın klub turnirlərinin qrup raundlarında beş tur arxada qalıb. Novator.az bildirir ki, gələn ay keçiriləcək son oyunlar ərəfəsində 12 klubun (“Atletiko”, “Borussiya” (Dortmund), “Barselona”, “Portu”, “Şalke”, “Bavariya”, “Ayaks”, “Mançester Siti”, “Real”, “Roma”, “Yuventus”, “Mançester Yunayted” ) Çempionlar Liqasında, 16 klubun (“Brügge”, “Benfika”, “Valensiya”, “Bayer”, “Sürix”, “Zalsburq”, “Zenit”, “Fənərbaxça”, “Dinamo” (Zaqreb), “Arsenal” (London), “Sportinq” (Lissabon), “Betis”, “Latsio”, “Ayntraxt” (Frankfurt), “Dinamo” (Kiyev), “Çelsi”) Avropa Liqasında yola davam edəcəyi dəqiqləşib.

2018-2019 mövsümü üzrə UEFA reytinqində 12,285 əmsalla İspaniya öndədir.

Mövsümü 1 komanda ilə davam etdirən Azərbaycan 2,375 əmsal toplayıb və 55 UEFA üzvü arasında 33-cü yerdədir.

Rusiya 6,416 əmsal, Türkiyə 4,700 əmsal, Ukrayna 4,600 əmsal, Qazaxıstan 4,250 əmsal, Belarus 4,000 əmsal yığıb.

Son beş mövsümün reytinqində də İspaniya birincidir: 96,283 əmsal.

Azərbaycan 19,000 əmsalla 26-cı pillədə durur.

Reytinq UEFA üzvlərinin Çempionlar Liqası və Avropa Liqasında son beş mövsümdə qazandığı əmsala əsaslanır. Qrup raunduna qədər qələbə 1, heç-heçə yarım xal; qrupda və sonrakı mərhələlərdə qələbə 2, heç-heçə 1 xaldır. Çempionlar Liqasının qrupuna düşmək 4 bonus xalı, 1/8 finala çıxmaq 5 bonus xalı, hər iki turnirin 1/4 finalına, yarımfinalına və finalına yüksəlmək 1 bonus xalı verir. Toplanan xallar qitə turnirlərinə vəsiqə almış ölkə klublarının sayına bölünür və mində bir dəqiqliklə əmsal çıxarılır.