UEFA Çempionlar Liqasının qrup mərhələsində beşinci tur arxada qalıb. Novator.az-ın məlumatına görə, D qrupunda yarışan Türkiyə təmsilçisi “Qalatasaray” noyabrın 28-i Rusiya paytaxtında “Lokomotiv”ə 0:2 uduzaraq mərhələ adlamaq şansını itirib.

“Portu” (Portuqaliya) – “Şalke” (Almaniya) görüşü 3:1 hesabı ilə başa çatıb. Bu iki klub növbəti mərhələyə vəsiqəni təmin ediblər, “Qalatasaray” (4 xalı var) və “Lokomotiv” isə (3 xal) son turda Avropa Liqasına köç etmək üçün yarışacaqlar.

28 noyabr oyunları ilə A qrupundan “Atletiko” (İspaniya) və “Borussiya” (Dortmund, Almaniya) 1/8 finala adlayıblar, “Brügge” (Belçika) Avropa Liqasına ələnib.

B qrupundan “Barselona” (İspaniya) 1/8 finala keçib. İkinci vəsiqə ya “Tottenhem”ə (İngiltərə), ya “İnter”ə (İtaliya) qismət olacaq. Hər iki komandanın 7 xalı var.

Beş turdan sonra C qrupunda “Napoli” (İtaliya) 9, PSJ (Fransa) 8, “Liverpul” (İngiltərə) 6, “Srvena Zvezda” (Serbiya) 4 xal yığıb.